Pasa den asteazkeneko 19:00etan 19 bazkide elkartu ginen udaletxeko batzar-aretoan, ARNOko estatutoen aldaketaren inguruko ez-ohiko batzarrean. Aldaketa hauen arrazoi eta helburuak duela gutxi azaldu genituen hementxe bertan: oraingo honetan bere ondorio praktikoak aipatuko ditugu, ahalik eta laburren.

Erabaki honen ondorioak, datorren ikasturtearen hasieran bertan

Kurtso bakoitzak 2 ordezkari hautatu beharko ditu ARNOko zuzendaritza-batzorderako (ez dute gela desberdinetako ikasleen gurasoak izan beharrik). Noiz? Iraileko lehenengo astean, ikasturtea aurkezteko egiten diren bileretan (urte bikoitietan). Gogoan izan:

  • LH6an ezik, kurtso guztietan egingo dela hautaketa, HH2tik LH5era.
  • Karguaren iraupena 2 urtetakoa dela.
  • Inoiz ARNOko batzordekide izan dena ez dagoela berriro hautatzerik, ez bera eta ezta bere bikotea ere.

Gainera, ARNOko zuzendaritza-batzordeko kide batzu gure ordezkari izango dira Eskola Kontseiluan

Zuzendaritza-batzordeko 6-9 kide Eskola Kontseilurako hautatuko ditugu. Noiz? Azaroan (urte bikoitietan). Gogoan izan:

  • Karguaren iraupena 4 urtetakoa dela.
  • ARNOko batzordekide izateak baino askoz zama arinagoa duela Eskola Kontseiluan ordezkari izateak, urtean hiruzpalau bileratan parte hartzea eskatzen baitu.

Zer dela eta aldaketa hauek?

  • Karguaren iraupena 2 urtetan finkatzea, batzordeko kide izateak dakarren zama arintzearren.
  • Kurtso bakoitzetik 2 ordezkari eskatzea, ARNO ikastolaren eta gurasoen arteko benetako zubi izan dadin.
  • Inoiz batzordekide izan dena (eta bere bikotea) hautaezina izatea, ARNOko ordezkaritzan egungo gizarteak duen aniztasuna islatzeko.